Fræðsluráð Ólympíunefndar Íslands var stofnað 25. mars 1987. Það var fyrir áeggjan Þorsteins Einarssonar, fyrrv. íþróttafulltrúa og Ingólfs Hannessonar, fyrrv. íþróttafréttastjóra RUV, sem báðir höfðu sótt námskeið IOC, að Ólympíunefnd Íslands ákvað að stofna fræðsluráð (Olympic Academy). Voru Danir einir fyrri til af Norðurlandaþjóðunum. Finnar fylgdu fast á eftir okkur, því næst Norðmenn og svo Svíar í kjölfar þeirra.
Aðdraganda að stofnun Ólympíufræðsluráða má rekja til Pierre de Coubertin, franska barónsins sem endurvakti Ólympíuleikana í núverandi mynd. Í augum Coubertins áttu ólympíuleikarnir að vera annað og meira en venjulegt heimsmeistarmót. Þeir áttu að vera alþjóðlegt sameiningarafl sem gæti stuðlað að friði og skilningi milli þjóða og manna, án tillits til trúarbragða eða litarháttar. Þeir áttu að grundvallast á ákveðnum siðareglum þar sem drengskapur og heiðarleiki ríkti í keppni og samskiptum manna á millum.
Coubertin fannst þessu boðskapur ekki komast nógu vel til skila í framkvæmd Ólympíuleikanna og vildi bæta úr því með því að stofna fræðasetur þar sem stund yrði lögð á ólympískar rannsóknir og kennslu í ólympískum fræðum. En það var ekki fyrr en löngu eftir fráfall Coubertin, árið 1961, að Carl Diem, gömlum samstarfsmanni hans tókst með aðstoð John Ketseas, grísks ólympíunefndarmanns að koma því til leiðar, að Alþjóðaólympíunefndin (IOC) ákvað að stofna Alþjóðaólympíufræsluráðið (IOA) í borginni Ólympíu í Grikklandi.
Þar hefur farið fram umfangsmikil fræðslustarfsemi og haldnar ráðstefnur og námskeið fyrir: íþróttaleiðtoga, íþróttakennara og þjálfara, leiðbeinendur í íþrótta og æskulýðsmálum, fjölmiðlafólk o.s.frv. Í þeim hópi eru nokkrir Íslendingar, sem hafa verið sendir til Ólympíu á vegum Ólympíunefndar Íslands og Ólympíusamhjálparinnar. Margir þeirra sem sótt hafa námskeið IOA hafa hrifist svo af ólympíuhugsjóninni og þeim fræðum sem þar eru kennd, að þeir hafa komið því til leiðar heima fyrir, að ólympíufræðsluráð hafa verið stofnuð í þeim tilgangi að útbreiða ólympíuhugsjónina meðal almennings og íþróttafólks.
Íslenska ólympíuakademían hefur
meðal annars staðið fyrir fræðsluráðstefnum fyrir almenning um ýmis
málefni sem tengjast Ólympíuleikum, frætt íþróttamenn sem farið
hafa til keppni á vegum Ólympíunefndar/ÍSÍ um ólympíuleikana og
Ólympíuhreyfinguna, auk þess sem hún sá um ,,teiknimyndasamkeppni
IOC". Síðast en ekki síst hefur Ólympíuakademían séð um að kynna,
auglýsa eftir þátttakendum, velja úr umsækjendum og undirbúa þá
útvöldu fyrir fræðslunámsstefnur IOA, sem haldnar eru í Ólympíu.
Námsstefna þessi er haldin árlega og hafa Íslendingar átt fulltrúa
árlega frá árinu 1989, að einu ári undanskildu. Á hverju ári
auglýsir ÍSÍ eftir þátttakendum á heimasíðu sambandsins og í
fjölmiðlum. Fylla þarf út sérstakt umsóknareyðublað á ensku
og umsókninni þurfa að fylgja tvær passamyndir.
1989 voru stofnuð alþjóðleg samtök þeirra sem sótt hafa þessar fræðslunámstefnur IOA og átti Ingólfur Hannesson stóran þátt í stofnun samtakanna, auk þess sem hann var í stjórn þeirra í 8 ár, þar af formaður í 4 ár. Samtökin nefnast nú International Olympic Academy Participants Association" (IOAPA). Ingólfur tók fyrstur Íslendinga þátt í kyndilhlaupi með Ólympíueldinn, en það var við borgina Spörtu á Pelópsskaga árið 1996 fyrir Óympíuleikana sem fram fóru í Atlanta sama ár.