Samskipti við fjölmiðla
Fjölmiðlar

Fjölmiðlar eru margir en helstu tegundir miðla eru aðallega fjórir. Sjónvarp, útvarp, blaðaútgáfa (dagblöð, tímarit, héraðsfréttir, fréttabréf), vefmiðlar og samskiptavefir. Allir þessir miðlar hafa mismunandi form á birtingu frétta og hvenær þeim finnst best að fá inn upplýsingar. Fyrir þessa miðla skiptir miklu máli hvaða dag vikunnar fréttatilkynning er send og hvenær dags hún er send út. Hér fylgir yfirlit yfir helstu fjölmiðla og nokkrar upplýsingar sem gott er að vita.

 
Dagblöð og tímarit
Fyrir frjáls félagasamtök líkt og sérsamböndin, héraðssamböndin, íþróttabandalög og íþróttafélög þá skiptir miklu að koma boðskapnum á framfæri á ódýran og hagkvæman hátt.

Nú á tímum margmiðlunar þá er dagblaðið og tímaritin enn einn af bestu kostunum til þess að koma boðskap á framfæri. Það er hægt að koma reglulega upplýsingum í birtingu þessarra miðla ef þú skrifar, áhugaverðar, fréttnæmar fréttatilkynningar.

Til þess að birtast reglulega í dagblöðum og tímaritum þarf útsjónarsemi, hugmyndaflug og smá rannsóknarblaðamennsku. Þó svo að umfjöllunin eigi að fjalla um íþróttir þá bjóða blöðin og tímaritin upp á ýmsa valkosti sem vert er að skoða og nýta sér um fram hefðbundar íþróttasíður. Hér koma nokkrir punktar til umhugsunar áður en frétt er skrifuð:
  • Kynnið ykkur hvað blöðin hafa upp á að bjóða annað en íþróttasíður, t.d. heilsa, lífið, fólk í fréttum, umræðan, innlent, viðskipti, sveitarfélög, sérblöð dagblaðanna o.fl.
  • Kannið hvernig greinar er verið að birta, hvernig þær eru uppsettar og hvaða sjónarhorn (fréttavinkil) fréttirnar hafa.
  • Athugið að það getur borgað sig að semja mismunandi fréttir eftir því hvar í blaðinu fréttin á að birtast. Nota hugmyndaflugið og reyna að vera frumleg.
  • Hafið samband við blaðamenn og spyrjist fyrir hvernig sé best að setja upp fréttirnar og fáið þá jafnvel til að aðstoða með að finna ný sjónarhorn á fréttina. Það sakar ekki að spyrja.
  • Ef það gengur illa að fá birtar fréttir, hafði samband við íþróttasambönd sem eru dugleg við að fá fréttir birtar og spyrjist fyrir hvernig þau bera sig að.
Hagnýt atriði í samskiptum við fjölmiðla.
Sýndu fjölmiðlum ræktarsemi.  Gerðu þeim auðvelt og eðlilegt að hafa samband við þig.  Athugaðu að fréttin er jafnmikils virði fyrir fréttamanninn, hvar sem atburðurinn á sér stað.  Þegar þú vilt koma á framfæri keppni, m.a. til þess að laða að áhorfendur, þá er keppnin frétt fyrir fjölmiðla í réttu hlutfalli við áhuga almennings og þá afreksmenn sem koma fram.  Einnig ef vonast má eftir góðri keppni eða leik.  Slík keppni er jafnmikil frétt þó hún sé ekki á þínum heimavelli, og þú þurfir ekki að hafa áhyggjur af hvort áhorfendur verði nógu margir til að borga brúsann!  Það hefur alltof oft komið fyrir á Íslandi að stórir og glæsilegir blaðamannafundir með miklum upplýsingum eru haldnir fyrir heimaleiki, t.d. í Evrópukeppni í knattleikjum, en svo heyrist hvorki stuna né hósti þegar farið er úr landi til að keppa á útivelli.  Þá er oft ekkert skilið eftir, ekki einu sinni símanúmer.  Og berist svo ekki ítarlegar fréttir af viðburðinum, er íþróttafréttamönnum kennt um.  Þannig, og raunar á fleiri vegu, hlaða menn upp ísveggi í samskiptum og samvinnu, veggi sem oft tekur tíma að bræða og brjóta niður.  Láttu þetta ekki koma fyrir þig, því þá vegur þú að egin heiðarleika og drengskap.
Útvegaðu þér persónuleg sambönd á ritstjórnarskrifstofunni.  Reyndu að komast að raun um hvort einhver fréttamanna hefur sérstakan áhuga eða þekkingu á þínu sérsviði.  Lestu og hlustaðu.  Vertu raunsær.  Áður en þú hefur samband, skaltu spyrja sjálfa(n) þig umbúðalaust hvort umræðuefnið snerti aðeins þig og þitt áhugasvið, eða hvort aðrir hafa hugsanlega áhuga á því líka.  Leggðu áherslu á vandaðar upplýsingar.  Betra er að bera fram eitt vel undirbúið erindi, en tíu sem höndum hefur verið kastað til.  Illa undirbúin mál og rangar upplýsingar hleypa illu blóði í fréttamenn.  Reyndu ekki að læða auglýsingu inn í ritað mál.

Það er auðveldara að koma hlutum á framfæri þegar baráttan um athyglina er minnst.  Tilraunir til að hafa samband á föstudögum eru dæmdar til að mistakast.  Flest laugardagsblöð eru unnin fyrirfram, fyrr í vikunni.

Segðu sannleikann, vertu heiðarleg(ur) og málefnaleg(ur).  Skapaðu traust og trúnað.  Það ber árangur.