Hollráð

Sýnt hefur verið fram á það að það er aldrei of seint að byrja að hreyfa sig. Jafnvel þó ekki sé byrjað fyrr en á efri árum, hefur það jákvæð áhrif. Með markvissri, stigvaxandi þjálfun má bæta heilsu og líðan fólks á hvaða aldri sem er.

Leitaðu ráða hjá lækni eða öðrum sérfæðingi áður en þú byrjar að stunda líkamsrækt ef þú:
• hefur ekki hreyft þig í langan tíma
• hefur of háan blóðþrýsting, hjartsláttartruflanir eða hefur fengið hjartaáfall
• færð verki eða finnur fyrir þrýstingi fyrir brjósti, í hálsi, öxl eða handlegg eftir líkamsáreynslu
• mæðist við litla áreynslu
• hefur veika liði eða bein
• færð svimaköst
• átt við önnur veikindi að stríða sem þarfnast lækniseftirlits

Hvað er heilsa?

Samkvæmt skilgreiningu Alþjóða heilbrigðismálastofnunarinnar (WHO) er heilsa þríþætt:
1. Líkamleg
2. Andleg
3. Félagsleg
Það er því ekki fullnægjandi að vera í frábæru formi líkamlega ef andlega og/eða félagslega hliðin eru ekki í lagi. Allt eru þetta samverkandi þættir sem styðja hver við annan og er mikilvægt að hafa það í huga þegar við ætlum að efla heilsuna.

Meginmarkmiðið með heilsurækt á að vera nr. 1, 2 og 3 aukin andleg og líkamleg vellíðan.

Ávinningur líkamsræktar

Líkamsrækt eldri borgara hefur aukist og er sýnilegri nú en áður þar sem tækifærum hefur fjölgað. Þetta er mjög jákvæð þróun því líkamsþjálfun fyrir eldra fólk er gríðarlega mikilvæg og sýna rannsóknir að með reglubundinni hreyfingu er hægt að hægja á þeim öldrunarbreytingum sem verða í líkamanum með hækkandi aldri. Líkamsþjálfun er til heilsubótar því hún léttir lund og losar um streitu, hægir á beinþynningu auk þess eykur hún:
• úthald við dagleg störf og tómstundir
• vöðvastyrk
• vöðvaþol
• liðleika
• snerpu og fimi
• jafnvægi og þar af leiðandi minni byltuhætta
• samhæfingu
• hraða og öryggi í hreyfingum
• kraft
• sjálfstæði og sjálfstraust

Sjö auðveldar heilsuvenjur

Rannsóknir á langlífi hafa leitt í ljós að fólk sem fylgir minnst sex af eftirfarandi sjö heilsuvenjum lifir lengur.
• Að nota ekki tóbak.
• Að vera sem næst sinni kjörþyngd (innan 20% fráviksmarka).
• Að stunda reglulega líkamsrækt.
• Að neyta morgunverðar.
• Að forðast snarl á milli mála.
• Að forðast neyslu áfengis. Sé þess neytt, skal það gert í hófi.
• Að sofa sem næst 8 stundum á sólarhring.

Hreyfing í daglega lífinu

Vegna tæknivæðingar og þjóðfélagsbreytinga síðustu áratuga er hreyfing ekki lengur jafn ómeðvitaður hluti af daglegu lífi margra eins og var. Hreyfing er eitthvað sem fólk þarf að vera sérstaklega meðvitað um og gera ráð fyrir í dagsskipulaginu. Það þarf að taka ákvörðun um að hreyfa sig og það sem reynist oft erfiðara, að framfylgja ákvörðuninni.

Við þurfum að hreyfa okkur daglega og velja þá hreyfingu sem hentar, t.d. að ganga, hlaupa, hjóla eða synda.
Við þurfum að vera meðvituð um að velja hreyfingu í stað hreyfingaleysis í daglega lífinu.

Þú getur stór aukið hreyfingu í þínu daglega lífi ef þú:
• Gengur upp stigann og sleppir lyftunni.
• Ferð úr strætó einni stoppistöð fyrr.
• Hjólar á áfangastað í stað þess að fara á bílnum.
• Ferð í göngutúr, þó svo að þú eigir ekki hund.
• Stendur upp þegar þú talar í símann, það eykur blóðflæðið.
• Leggur í bílastæðið sem er lengra frá.

Mundu að hlæja meira, það minnkar streitu og léttir lund.