ÍÞRÓTTA- OG ÓLYMPÍUSAMBAND ÍSLANDS

Framundan er síðasti keppnisdagur Ólympíuhátíðar Evrópuæskunnar í Trabzon í Tyrklandi. Á morgun keppa allir íslensku sundkrakkarnir og Sindri Hrafn Guðmundsson keppir til úrslita í spjótkasti. Að keppni lokinni verður lokaathöfn haldin. Hér til hliðar má sjá mynd frá setningarathöfn leikanna, þar má sjá Helgu Magnúsdóttur aðalfararstjóra og Örnu Stefaníu Guðmundsdóttur fánabera ásamt tyrkneskri aðstoðarkonu. Setningarathöfnin var hin glæsilegasta, á henni lýsti forsætisráðherra Tyrklands yfir að landið hyggist sækja um að fá að halda leikana í Istanbúl árið 2020. 

Í kvöld, sunnudaginn 24. júlí, fer fram setningarhátíð 11. Ólympíuhátíðar Evrópuæskunnar í Trabzon í Tyrklandi.  Hefst hún kl. 20:15 á tyrkneskum tíma, eða 17:15 á íslenskum tíma.

Fánaberi Íslands verður Arna Stefanía Guðmundsdóttir, keppandi í frjálsíþróttum.  Arna Stefanía er fædd árið 1995 og er Norðurlandameistari í 400m hlaupi 19 ára og yngri, hún náði lágmarki fyrir HM 17 ára og yngri á þessu ári og keppti þar í sjöþraut.  Þá sigraði hún í 400m hlaupi á Smáþjóðaleikunum í Liechtenstein fyrr á þessu ári.

Hátíðin fer fram á á Hüseyin Avni Aker vellinum í Trabzon sem tekur 24.000 manns í sæti og verður sýnt beint frá henni í tyrkneska sjónvarpinu.

Keppnin hefst á mánudagsmorgni og verða það keppendur í sundi, tennis og frjálsíþróttum sem keppa fyrir Íslands hönd þann daginn, en aðrar greinar fara í gang degi síðar.

Dagana 23.- 30 júlí fer fram 11. Ólympíuhátíð Evrópuæskunar í borginni Trabzon í Tyrklandi.  Íþrótta- og Ólympíusamband Íslands sendir 22 keppendur til leiks í 6 íþróttagreinum, en alls telur íslenski hópurinn 38 aðila, með dómurum, þjálfurum og fararstjórn.

Ólympíuhátíðin er með stærri íþróttaviðburðum sem haldnir eru í Evrópu og fara þeir fram á tveggja ára fresti.  Alls er keppt í 9 íþróttagreinum, og tekur Ísland þátt í sex þeirra: fimleikum, frjálsíþróttum, hjólreiðum, júdó, sundi og tennis.  Aðrar greinar eru blak, handknattleikur og körfuknattleikur, en sjö efstu lið í styrkleikalista Evrópu fá keppnisrétt í boltagreinum auk gestgjafa.

Íslenski hópurinn hélt utan miðvikudaginn 20. júlí, enda um langt ferðalag að ræða frá Íslandi til norðausturhluta Tyrklands, þar sem Trabzon stendur við Svartahafið.  Fyrstu dagana æfir hópurinn ásamt keppendum Danmerkur og Finlands og er markmið þessara æfingabúða að efla samstarf Norðurlanda og undirbúa keppendur á sem bestan hátt m.t.t. veðurfars, tímamismunar og aðstæðna.  Föstudaginn 22. júlí halda þátttakendur í fimleikum frá Íslandi og sameinast hópnum í Trabzon.

Aðalfararstjóri íslenska hópsins er Helga H. Magnúsdóttir sem situr í framkvæmdastjórn ÍSÍ og mótanefnd evrópska handknattleikssambandsins.  Helga er reynslumikil er kemur að ferðalögum íþróttahópa og mótahaldi í Tyrklandi og hefur verið fararstjóri á Ólympíuhátíð æskunnar tvisvar áður.

Líney Rut Halldórsdóttir, framkvæmdastjóri ÍSÍ, situr í nefnd um Ólympíuhátíð Evrópuæskunnar á  vegum Samtaka evrópskra Ólympíunefnda og mun hún fylgjast með leikunum og þátttöku Íslands.  Hún stitur í þriggja manna eftirlitsnefnd með undirbúningi og framkvæmd næstu Ólympíuhátíðar í Utrecht í Hollandi árið 2013.

Vonast er eftir góðum árangri keppenda á leikunum í ár, en keppnin er hörð og eru bestu íþróttamenn Evrópu á aldrinum 15-18 ára í þessum íþróttagreinum meðal keppenda.  Mikið hefur verið lagt í keppnisaðstöðu og ný mannvirki hýsa flestar greinar auk þess sem að Ólympíuþorpið er nýbyggt og var íslenski hópurinn einn sá fyrsti sem flutti inní þorpið aðfararnótt fimmtudags.

Setningarathöfnin fer fram sunnudaginn 24. júlí kl. 20:30 á Hüseyin Avni Aker vellinum í Trabzon sem tekur 24.000 manns í sæti.  Lokahátíðin fer fram á sama stað, föstudaginn 29. júlí og hefst hún kl. 20:30 að staðartíma.

Hópurinn kom til Trabzon seint síðustu nótt eftir langt ferðalag frá Íslandi.  Á meðfylgjandi myndum má sjá hópinn á flugvellinum við komu, í morgunverði fyrsta daginn og eitt húsa Ólympíuþorpsins sem er skreytt fánum þátttökuþjóða.